1. Бош сахифа

Олий Суд раисининг биринчи ўринбосари вилоятда ташкил этилган сайловга тайёргарлик ишлари билан яқиндан танишмоқда

×

Жорий йилда бўлиб ўтадиган, мамлакатимиз ва халқимиз ҳаётидаги муҳим сиёсий жараён – Ўзбекистон Республикаси Президентлиги сайловига ҳар томонлама тайёргарлик кўриш, уни кўтаринки руҳ ва умумэътироф этилган мезонлар асосида ташкил этиш мақсадида ҳудудларда жадал суратларда тайёргарлик ишлари давом эттирилмоқда.

Кеча, 5 июнь куни Ўзбекистон Республикаси Олий суди раиси ўринбосари Махмудова Робахон Анваровна сайлов жараёнига тайёргарлик ишлари билан яқиндан танишиш учун Фарғона вилоятига ташриф буюрди. 

Унга вилоят ҳокимининг жамоатчилик билан ишлаш бўйича маслаҳатчиси Ю.Камолов ҳамроҳлик қилди.
Шу куннинг ўзида Фарғона, Марғилон ва Қувасой шаҳарлари ҳамда Фарғона ва Қува туманларида сайлов жараёнига боғлиқ ташкил этилган ишлар ўрганилди. 

Ўз ташрифини Фарғона шаҳрида жойлашган намунали сайлов участкалари ҳамда сайловга масъул бўлган ходимларни ўқитиш учун ҳозирланган ўқув хоналарида яратилган шарт-шароитларни ўрганишдан бошлаган Робахон Анваровна амалга оширилган ишларни танқидий кўриб чиқиб, қониқарсиз ахволдалигини, қилиниши лозим бўлган ишлар ҳали ҳам мавжуд эканлигини таъкидлаб, керакли кўрсатма ва топшириқларни бериб ўтди.

Шунингдек, Қувасой шаҳар ҳамда Қува туманларида ташкил этилган намунали сайлов участкалари ва ўқув-машғулот жараёнлари бўлиб ўтадиган жойларда ҳам айрим камчиликлар аниқланиб, уларни бартараф этиш бўйича керакли кўрсатмалар берилди.

Олий Суд раиси биринчи ўринбосарининг Фарғонага ташрифи давом этади. Эртага вилоятимизнинг қолган шаҳар ва туманларида сайлов жараёни билан боғлиқ ишлар билан танишиб чиқиши режалаштирилган.